Tam sim no nyob hauv xeev Minnesota, raws li Rep. Fue Lee tau hais tawm, nomtswv ntawm pab pawg Democrats thiab Republicans pom zoo txog ntawm pob nyiaj los siv pab rau pejxeem. Pab pawg uas hu tias People of Color and Indigenous tsis pom zoo vim yog nyob hauv pob nyiaj no lawv yuav tsis pub muaj MinnesotaCare uas yog ib qhov program los pab rau cov pejxeem txomnyem los yog tsis muaj ntaub ntawv nyob tebchaws no. Yog li no nej ib txwm tau txais MinnesotaCare yuav tsis txais lawm, tsuas yog menyuam thiaj li qualify lawm xwb.
Tiamsis kuj muaj ntau yam uas lawv tiv thaiv tau kom muaj mov rau menyuam noj tom tsev kawm ntawv, muaj Earned Sick and Safe Time, thiab Paid Family & Medical Leave, mus rau lwm yam.
Xyoo no yog txwm nkaus 50 xyoo Hmoob tuaj poob rau Asmeskas, pom tau tias Hmoob nyob xeev Minnesota kuj vam meej mus deb lawm. Raws li kev sau los ntawm Dr. Bruce Corrie, yav dhau los mus txog xyoo 2021, cov nyiaj Hmoob siv tawm yog $2.3 Billion dollas. Cov se pejxeem Hmoob them yog $286 million dollas. Hmoob them vaj tse yog raug $4.1 billion dollas. Kev kawm ntaub kawm ntawv nce mus rau li ntawm 84% feem pua. Cov Hmoob tau haujlwm nce mus rau 50,437 leej nyob hauv txhua qhov chaw xws li manufacturing, education, healthcare, social services, professional services, thiab retail. Hmoob cov lagluam muaj ntau tshaj 9,000 lub. Kev txomnyem poob 31.6 feem pua los rau 14.6 feem pua muab piv li thaum 2000 los txog 2021. Hmoob muaj 9 tug mus ua nom ua tswv, muaj 4 leeg tau tuav lub meejmom Committee Chair. Tseem tshuav ntau yam Hmoob ua tau nyob xeem Minnesota.
Xovxwm los ntawm Alpha News tshaj tawm tsis ntev no txog Tub Thoj uas yog ib tug tub ceevxwm uas muaj kev cuam tshuam txog ntawm George Floyd rooj plaub. Raws li Tub Thoj tham nrog tus reporter, nws hais tias cov nom tswv hauv nroog Minneapolis tsis muaj kev ncaj ncee thiab lawv yog cov neeg dag. Tub Thoj tsuas ua nws txoj haujlwm raws li ib tug tub ceebxwm xwb vim li cas nws thiaj li raug mus kaw. Tub Thoj raug mus kaw 4 xyoos thiab 9 lub hlis raws li Court txiav txim. Tub Thoj hais tias, thaum nws tawm los lawm, nws mam los qhia qhov tseeb kom sawvdaws paub.
Thaum kawg no, Dr. Talee Vang raug xaiv los ua ib tug ntawm 25 leeg uas yog top finalists rau ntawm qhov Fierce Healthcare DEI Award. Nyob ntawm qhov award no, tus neeg ntawv yuav tsum muaj peevxwm qhia txog kev noj qab haus huv kom muaj vaj huam sib luag, ntau zaus nws tsis yoojyim. Yuav tsum muaj tswvyim zoo thiaj li los txog theem no. Peb nrog Dr. Talee Vang zoo siab. Nco tsoov mus subscribe rau 3HMONGTV hauv Youtube thiab caum peb hauv Facebook.
