Xovxwm tshaj tawm tias Donald Trump yuav kom Apple them 25% tariff yog tias Apple tsis los ua cov iphones hauv tebchaws Asmeskas. Tump hais nyob hauv social media tias Apple yuav tsis txhob mus manufacture lawv cov iphone rau India, los sis lwm lub tebchaws. Tamsim no Trump npaj yuav kom cov tebchaws sab Europe yuav tsum them 50% tariff pib lub 6 hli mus.
Muaj lub ceebtoom rau sawvdaws txog tus kab mob measle. Tamsim no Centers for Disease Control and Prevention tshaj tawm tias muaj ntau tus neeg kis kab mob measles thaum sijhawm lawv caij davhlau hauv tebchaws Asmeskas. Tus kabmob measles no yog tawm ib cov pob liab li pom no los yog Hmoob hais tias mob qhua pias. Kev kis tau tus kab mob no yog thaum mus xyaw neeg coob. Txij xyoo no los mus muaj li 60 tus neeg kis kabmob measles thaum ya davhlau. Raws li cov koomhaum saib xyuas kev noj qab haus huv tau tshaj tawm, tus kabmob measles no kis tau zoo thiab yoomyim heev.
50 ntawm 60 tus neeg kis yog zaum ze nrog tus neeg nws twb kis tus kab mob no lawm. Xyoo 2025 no xwb twb muaj 1,088 tus neeg kis tus kabmob measle no lawm. CDC ceebtoom rau pejxeem sawvdaws tias lub caij ntuj sov yuav muaj neeg coob tawm tuaj mus uasi, yuav tsum mus txhaj tshuaj tiv thaiv kabmob measle ua ntej mus ncig ua si txawj xeev los sis txawj tebchaws.
Muaj ib tug txiv neeg lub npe hu ua Toudeng Thao, 59 xyoos, nyob nroog La Crosse, xeev Wisconsin, tau raug mus kaw 7 xyoo thiab ib nrab vim yog nws xa los sis txais cov tshuaj methamphetamine los muag. Tsis tas li tus kwv tswj cai pom tias nws yog tug neeg muaj keebkwm ua phem thiab muaj phom yav dhau los thiab tsam nws ua phem rau lwm tus. Xovxwm hais tias nws yeej xa thiab txais cov tshuaj no 6 lub hlis ua ntej raug ntes. Tsis tas li Toudeng yeej lees tias nws tau txais thiab xa cov tshuaj methamphetamine tuaj hauv xeev Minnesota, California, Canada, thiab Mexico tuaj mus rau 6 chaw txais yuav cov tshuaj no. Joua Thao uas yog nws pojniam nkawv muag tag li 203.9 grams Methamphetamine nyob hauv nroog La Crosse. Joua Thao raug nyob probation 5 xyoos. Toudeng Thao raug kaw 7 xyoo thiab ib nrab hauv federal prison.
Xyoo no Hmong International Freedom Festival yuav muaj rau lub 6 hli hnub tim 28 thiab 29 nyob rau tim McMurray Fields hauv nroog St. Paul. Xyoo no lawv yuav rov tsis sau nqi ntawm rooj vag li xyoo tas no thiab. Parking tom State Fair yog $20 dollas. Raws li hais hauv daim flyer, lawv yuav ntau tshaj 40 qhov live stage performances, muaj beer garden, thiab muaj golf cart rau neeg xaub caij. Yog leejtwg muaj lus noog hu rau lawv tau li ntawm daim ntawv no.
Thaum kawg no, lub koomhaum SGU veterans thiab families of USA, tshaj tawm tias qhov project uas lawv tau kaw cov qub tub rog cov dabneeg twb muab tso tawm hauv Youtube lawm. Yog tias leej twg xav saib mus saib ntawm SGU Veterans Organization nyob hauv Youtube.
