Tamsim no muaj ib phau ntawv tawm tshiab sau txog Hmoob. Cov ntawv no muaj npe hu tias 100 quetions and answers about Hmong Americans – Secret no more, sau los ntawm Michigan State University School of Journalism. Nyob rau ntawm phau ntawv no, yuav qhia txog hais tias Hmoob yog dabtsi, Hmoob tuaj qhov twg tuaj, Hmoob nyob li cas noj li cas, thiab txog tej kev nyuaj heev nyob hauv Hmoob lub neej es Hmoob twb ua dhau los lawm. Cov ntaub ntawv no yuav pab kom lwm haiv neeg paub txog Hmoob zoo tshaj tamsim no mus rau tom ntej. Yog xav paub txog phau ntawv no, tamim no muaj muag nyob hauv Amazon, Barnes & Noble, thiab hauv Books Store. Phau ntawv tus nqi yog $15. Mus nyeem online ces yog $9.99.
Nyob rau teb caws Asmeskas, yuav los yog muag Lej thaib yog ib qhov txhaum cai. Tsis ntej dhau los nyob rau nroog St. Paul muaj 2 tug txiv neeg raug ntes vim muag thiab yuav lej Thaib. Ob tug txiv neej no muaj npe tias King Thao, 57 thiab Choua Yang, 61 raug ntes vim yog txoj kev muag lej thaib raws li xovxwm tau hais. nkawv raug 4 lub txim los ntawm kev muag lej ua ke. Nyob rau Bangkok Thaibteb mas tsis ua cas tiamsis nyob rau tebchaws no, txwv tsis pub muag thiab yuav lej Thaib. Kev ntes zaum no tsis yog cia li tuaj txhom xwb, tub ceevxwm yeej xwj txij li xyoo 2021 los lawm nyob rau ntawm 995 txoj kev University hauv nroog St. Paul. Tub ceevxwm tshawb tau ib ob peb phau ntawv notebooks nrog ib cov receipts thiab 3 phau lej Thaib. Yog tias leejtwg muag thiab yuav lej Thaib, yuav raug ntes thiab tseem yuav raug nplua.
Raws li xov xwm tau hais, tamsim no Nplog tso cai rau cov neeg Thaib thiab Nyab Laj tuaj saib tebchaws uas siv lawv daim ntawv hla tebchaws tuaj nyob tau 10 hnub lawm. Yav dhau los tsuas pub nyob 3 hnub xwb. Nplog xav kom neeg txawv tebchaws tuaj ua si rau NPlog teb coob li coob tau txij li thaum lawv qhov campaign hu tias “Visit Laos Year 2024” pib los li 6 lub hlis no lawm.
Thaum kawg no, qhov peb zoo siab tshaj yog peb tus ntxhais Hmoob Suni Lee sib xeem dhau qhov Gymnastics Olympic Trials hauv nroog Minneapolis thiab raug xaiv mus sib xeem nyob rau Paris 2024. Simone Biles thiab Suni Lee, tau raug xaiv rov mus sib xeem Olympics nyob rau Paris 2024. Suni Lee hais tias nws twb xav tias ntshe yuav tsis los xeem ntxiv lawm vim yog kev muaj mob. Tiam sis zaum no kuj rov qab tau mus xeem Olympics zaum ob dua. Peb txhua tus pab nrog zoo siab rau Hmoob tus Ntxhais Suni Lee. Cia siab tias nws yuav rov yeej ib lub gold medal ntxiv thiab.
