3HMONGTV News | December 12, 2025

Archive – Nyob rau hauv tsev neeg Hmoob, pom tau tias qhov xovxwm txog ntawm tus txiv neej Hmoob muab phom tua nws pojniam tag sim neej ua rau coob tus tshwj xeeb yog cov pojniam rov los tham txog hais tias yog vim li cas tej kev zoo li pheej muaj ntxiv. Raws li xovxwm txhaj tawm Chang Thoj, 45 xyoos tua Kiab Hawj 41 xyoos tau tag sim neej rau lub 12 hlis hnub tim 7 thaum 3:30 sawv ntxov vim muaj kev sib cav sib ceg. Kev sib tua zoo li no tsis yog zaum ib xwb, nws yeej muaj ua ntu zus nyob rau cov xeev uas muaj Hmoob nyob. Tsis ntev tom ntej no yuav muaj cov koomhaum tuaj tham nyob ntawm 3Hmongtv txog cov teebmeem sib ntaus sib tua no, nrhiav kev los cheem kom txhob muaj cov teebmeem zoo li no lawm. Yog leejtwg tab tom ntsib cov teebmeem ntawm txij nkawm hauv vaj haus tsev, txhob tag kev cia siab, muaj koomhaum yuav pab tau rau koj. Hu rau tus xovtooj tshwj ntawm no. Txawm nej nyob lub xeev twg los lawv muaj peevxwm yuav pab tau. Hu mus nrog lawv tham.
24-hour Domestic Violence Hotline: 800-799-7233 los yog text rau 88788

Tamsim no tsov rog ntawm Thaib thiab Khabmin rov pib loj heev tuaj lawm txawm tias twb kos npe pom zoo sib tuav tes los ntawm ob tog li nyob hauv daim ntawv cog lus uas President Trump yog ib tug tim khawv.Trump twb ua kev zoo siab hais tias nws pab ob lub tebchaws no nres tau tsov rog lawm tiamsis twb rov sib tua dua lawm thiab.
Hnub no Trump hais tawm hauv social media tias tom qab nws hu nrog Thaib thiab Khabmin tus Prime Ministers tham nkawv pom zoo rov los cog lus dua tshiab kom txhob sib tua ntxiv txij hmo no 12/12 mus lawm.

Hnub no President Trump tso tawm nws daim $1M dollas Gold Card Immigration visa program. Yog ib tus neeg twg them $1M yuav daim card no, nws yuav muaj kev los ua Citizen Asmekas thiaj tuaj nyob tau tebchaws no. Yog xav apply los yog xav paub ntxiv, nej mus rau ntawm trumpcard.gov.

Hno no nyob xeev Minnesota, Governor Tim Walz xaiv tau Tim O’Malley los ua tus Director of Program Integrity ntawm qhov program hu tias Statewide Fraud Prevention uas saib xyuas kev dag nyiaj txiag thoob plaws xeev Minnesota. Qhov program nyuam qhuav tsa muaj vim muaj neeg coob ua koomhaum cuav dag tau nyiaj ntau txog lab dollas. Tim O’Malley txoj dejnum tamsim no yog ib tug Chief Judge los yog kws tswj cai nyob hauv Court of Administrative Hearings thiab nws kuj yog tus Superintendent qub nyob hauv Minnesota Bureau of Criminal Apprehension thaum Tim Pawlenty yog Governor.

Nyob xeev Minnesota, hnub kawg ntawm kev ua ntaub ntawv xaiv ntawv kho mob hauv MNSure twb yuav los rau lub 12/15, Monday no lawm xwb. Yog nej tsis npaj ua cov ntaub ntawv no, nej yuav tsis tau txais ntawv kho mob pib lub 1 hlis xyoo 2026 no mus. Yog nej leejtwg xav tau kev pab ua cov ntaub ntawv no, hu rau Hmong American Partnership hauv St. Paul los yog CAPI nyob nroog Minneapolis.

Yog nej leejtwg ua teb nyob xeev Minnesota, lawv yuav qhib daim application txog Farmer Tax Credit los ntawm Minnesota Department of Agriculture, rau lub 1 hlis 2026. Nyob rau ntawm qhov program no, lawv muaj $4M dollas los pab rau sawvdaws. Yog koj xav tias tejzaum koj qualify, kavtsij mus apply kom ntxov li ntxov tau. Yog muaj lus noog hu rau tus xovtooj ntawm no –  651-201-6316.

Thaum kawg no peb HmoobTV muab lus sijhawsm no los hais txog Tub Ntawg Xyooj uas nws tau tag sim neej tau 2 xyoos txwm nkaus rau nag hmo, 12/11. Tub Ntxawg raug neeg phem tua nyob rau Medohim tebchaws Colombia, sab qab teb Asmekas lub 12/11/2023. Peb yuav nco ntsoov Tub Ntxawg txoj kev txhawb tsev neeg Hmoob.