Lub koomhaum Hmoob 18 xeem nyob xeev Minnesota tau caw tus thawj ntawm St. Paul Police Department, Mayor nyob nroog Maplewood, thiab tub ceevxwm sawv ncev hauv nroog Minneapolis tuaj tham txog kev pab rau pejxeem Hmoob txog ntawm ICE ntes thiab xa neeg rov qab.
Tus thawj hauv St. Paul police department, Chief Henry Axel tau hais tseeb tias lawv yeej yuav tsis koom tes nrog ICE ntes sawvdaws kom ua siab loj. Cov tub ceevxwm nyob nroog Minneapolis los yeej tsis muab kev koom tes nrog ICE ntes neeg. Yog tias lawv tus neeg ntawv muab kev txhaum cai lwm yam tejzaum lawv yuav ntes tiam sis lawv tsis muaj cai ntes ib tug neeg twg uas tsis muaj ntaub ntawv nyob tebchaws no. ICE tsis muaj cai tuaj koom ntes nrog tub ceevxwm txhom neeg. Yuam tsum yog tso cai los ntawm tus Mayor nyob rau lub nroog ntawv. Tus Mayor nyob nroog St. Paul, Mayor Melvin Carter, thiab tus Mayor hauv Minneapolis yuav tsis koom tes nrog ICE es kom sawvdaws nyab xeeb tsis txhob ntshai. Qhov nov tsis txhais tau tias ICE yuav tsis txhom neeg. Representative Kaohly Her hais tias sawvdaws yuav tsum paub txoj cai. Yog tias ICE ntes nej leejtwg lawm, tsis txhob hais lus, tsis txhob teb lawv, tsis txhob kos ntaub ntawv dabtsi, tsuas yog ceebtoom lawv tias koj yuav nrog koj tus kwvlijchoj tham.
Nco ntsoov tig los saib peb kev sibtham nrog Hmoob 18 xeem thiab kwv lijchoj tham txog immigration rau lub 2/20 thiab 27 thaum 7 teev tsaus ntuj nyob hauv 3HMONGTV.
