Raws li xovxwm tshaj tawm hnub no muaj ib tug ntxhais Hmoob muaj npe hu tias Ma Yang, 37 xyoo, raug xa rov qab mus teb chaws Nplog lawm. Peb yuav muab cov xovxwm txog tus ntxhais ntxhais kom tsis paub lus Askiv to taub zoo zog. Raws li xovxwm hais, Ma twb nyob nroog Milwaukee txij thaum nws muaj 8 hli los lawm.
Vim li cas Ma Yang thiaj li raug ICE ntes xa rov qab. Thaum muaj kabmob COVID-19, Ma thiab nws tsev neeg tsiv los nyob rau ib lub tsev ua muaj neeg muag xas. Ma thiaj li raug ntes nrog 25 tug neeg uas ua txhaum cai nyob rau 2020. Nws zoo siab lees txim ces raug mus kaw 2 xyoos thiab ib nrab.
Lub sijhawm ntawv nws tseem tsis tau yog US citizen, tseem tuav npaj ntsuab xwb. Ma tus kws lijchoj hais yuam kev rau nws tias qhov nws los lees txim yuav tsis ua li cas rau nws kev nyob tebchaws no tiamsis lawv cia li tshem nws cov ntaub ntawv tsis pub nyob tebchaws Asmeskas. Nws hais tias yog paub tias lawv yuav tshem nws daim npav ntsuab, tejzaum nws yuav tsis kam lees txim es txawm kaw ntev me ntsis los tsis ua cas.
Qhov tseeb Ma twb raug kaw thiab mus pw lub txim tag lawm es yog vim li cas lawv tseem xa nws rov qab thiab. Thaum nws hais plaub tag lawm lawv muab nws xa mus rau ICE qhov chaw nyob xeev Minnesota. Thaum ntawv muaj ib tug kws lijchoj hais rau nws tias kom nws kos npe pom zoo txais qhov deportation order ces lawv thiaj li tso nws los.
Ma tus kws lijchoj thiaj li kom nws kos npe pom zoo tejzaum lawv yuav tsis xa rov qab vim cov neeg raug xa tsawg heev thiab yav dhau los Nplog yeej tsis lees txais cov neeg no.
Ma thiaj li rov ntiav ib tug kws lijchoj tshiab los khiav qhov case vim thawj zaug tsis muaj kws lijchoj zoo los sawv ncev rau nws tiam sis tus kws lijchoj tshiab no tsis muaj nws qhov case los qhib saib.
Tom qab lawv tso nws tawm los, Ma thiab nws tus txiv nkawv los yuav tau ib lub tsev nyob South Milwaukee. Lub sijhawm ntawv Ma yeej mus ntsib ICE tsis tu ncua. ICE thiaj li kom Ma mus ntsib lawv hauv nroog Milwaukee.
Thaum nws mus txog ces lawv cia li ntes nws, xa nws mus kaw rau Indiana. Nws mus nyob nrav me ntsis vim Nplog tsis leeg txais nws rov qab. Tom qab 2 lub weeks, lawv xa Ma mus rau Chicago ces xa mus tom tshav nyob hoom lawm. Thaum no Ma thiaj li paub tias nws raug xa rov qab lawm tiag tiag.
Tub ceevxwm hais rau Ma tias nws yuav los tsis tau rau tebchaws Asmekas lawm. Thaum nws mus txog Nplog teb lawm nws tsis paub yuav ua li cas ntxiv.
Ma tus txiv nyuaj siab heev pw tsis tsaug zog, thiab tseem yuav los tu nkawv cov menyuam tam li ib leeg txiv lawm xwb.
Raws li Ma pom mas kev xa Hmoob rov qab mus Nplog teb yog ib Asmeskas ntxeev siab rau Hmoob vim yav dhau los, Hmoob yeej ib txwm pab CIA. Hmoob cov tub rog tau pab Asmeskas thaum tsov rog nyab laj, ces tseem raug txim vim yog kev pab Asmeskas.
Ma hais tias yog vim li cas nej thiaj xa peb rov qab peb twb pab nej tua nyaj laj. Tamsim no Ma niam muaj mob tsis muaj leejtwg los pab tus nws. Tsis tas li Ma tsis paub xyov yuav ua li cas, nws tsis paub lus Nplog. Nws twb tsis paub yuav pab nws tus kheej li cas.
Tej yam zoo li no, tsis paub tias yuav raug leejtwg. Tejzaum kuj raug tus txheeb ze ntawm koj los yeej mob siab. Vam thiab cia siab tias Ma qhov dag neeg yuav ua ib qho rau sawvdaws kawm. Yog thaum raug ICE ntes lawm, paub txoj cai, tsis txhob tham ntau, tsuas hais tias koj xav ntsib koj tus kwslijchoj. Tsis txhob kos npe rau tej ntaub ntawv ICE muab los. Tsis txhob pom zoo lossis lees tej lus ICE tau hais rau koj.
