Ntawm no yog Thaiv Yaj ntawm Nyob Zoo Milwaukee TV tham me ntsis nrog Doug Amhoff.
Yee Leng Xiong tus thawj tswj ntawm Hmong Wausau Festival hias tias kev caw ib tug nom tseem ceeb zoo li Doug Amhoff no tsis yoojyim kiag li.
Tsis yog hais tias Doug Emhoff tuaj ntsib Hmoob xwb tiamsis qhov tseem ceeb nws tuaj zaum no yog xav kom Hmoob mus npov npav rau Vice President Kamala Harris los ua President xyoo no. Ntseeg lawm hais tias kev nws tuaj zaum no yuav coj Hmoob mus ze ib theem rau tim Washington DC. Xyoo no yog xyoo 7 ntawm Hmong Wausau Festival.
Raws li Eh Xyooj, Tub Ntxawg tus tij laug tau sau ntawv nyob hauv social media hais tias tub ceevxwm nyob Medelin, Colombia, rov ntes tau tus neeg phem tuag Tub Ntxawg uas nyuam qhuav khia dim tsis ntev dhau los no. Tus neeg no yog tus hnav lub tsho T-Shirt dawb li pom ntawm daim dua no. Eh hais tias nws ua tsaug rau cov tub ceevxwm rau lawv txoj kev rov ntes tau tus neeg phem zaum no.
Thaum kwg no, Minnesota Governor Tim Walz muaj hnub Friday, 7/26/2024 zwm ua Minnesota Olympians Day los ua kev zoo siab rau 12 tug kislas uas tau mus koom nrog ntiaj teb cov kislas keej tshaj plaws nyob rau 2024 Paris Summer Olympics. Governor Walz hais tias nws qhuas thiab zoo siab heev rau cov kislas no uas lawv sawv cev lub xeev Minnesota mus rau Paris. Nws hais txiv tias txawm zoo li cas los xeev Minnesota yeej muaj ntau yam los ua kev zoo siab nyob rau lub caij uas muaj Olympic li no. Peb zoo siab thiab qhuas peb Hmoob tus ntxhais Sunisa Lee.
