Nag hmo, lub 8/18, Hmoob muaj ib lub vaj tshuaj los yog hu tias Hmong herbal garden qhib nyob rau tom Minnesota Landscape Arboretum rau sawvdaws tuaj saib thiab kawm txog Hmoob cov tshuaj ntsuab. Zaum no yog thawj zaug uas Zooxis Lis tsim muaj ib lub vaj Hmoob no nyob rau hauv Minnesota Aboretum. Zooxis thiab nws tsev neeg yeej ib txwm ua teb nyob xeev Minnesota los ntev lawm. 3Hmongtv tau mus koom thiab muab qhov xovxwm no.
ZooXis niam yog May Lee. May Lee yog thawj tus Hmoob tau los txais lub meejmom 2024 McKnight Culture Bearer Fellow. May Lee yog thawj tus Hmoob ua teb tsis rau chiv chemical, lus Askiv hu tias Organic Farming nyob xeev Minnesota.
Lub ntsiab ntawm lub vaj Hmoob no yog los qhias txog Hmoob cov tshuaj ntsuab uas Hmoob yeej ib txwm siv los kho kev mob nkeeg. Qhia rau sawvdaws tias Hmoob cov tshuaj ntsuab yog los qhov twg los. Asmiska pom tau hais tias Hmoob cov tshuaj ntsuab no yeej muaj vitamin thiab benefits rau tib neeg.
Nyob rau hnub ntawv, lawv kuj muaj tshuaj rau qaib rau sawvdaws saj. Tsis tas li, lawv kuj muaj tshuaj ntsuab pub dawb rau sawvdaws. Lub vaj Hmoob no ua ib qhov kev kawm rau cov neeg Asmiskas thiab txhua tus tshwj xeeb yog cov menyuam loj hlob teb chaws no.
