Hnub no Driver thiab Vehicle Services muaj ib lub rooj tshaj tawm txog kev ua kom yoojyim rau pejxeem Minnesota txhua tus tau daim ntawv tsav tsheb. Qhov kev no yuav pib muaj rau lub 10/01 yuav los no. Ib qhov ua kom yoojyim yog lawv muab qhov xeem license ua ntawv Hmoob. Yog koj tsis muaj ntaub ntawv nyob raws li txoj cai los yeej muaj txoj kev koj ua tau daim ntawv tsav tsheb. Yog xav paub ntxiv mus saib nyob rau ntawm drive.mn.gov.
Tam sim no tus tub Nuj Xyooj uas tau raug riam hlais nws ntawm caj pas mus kho tom tsev kho mob kuj zoo me ntsis lawn tiam si tseem hais tsis tau lus nrov. Kuj yuav muaj ntau qhov procedures kho nws nyob rau tom ntej. Hmo no 3HMONGTV kuj nrog Nuj txiv tham me ntsis txog qhov teebmeem no. Peb yuav tsis muab tham ntxaws rau nej vim yog muaj tej yam txaus ntshais. Raws li leej txiv tau hais, tus tub Meng Vaj twb nroo txog kev nyuaj siab ua ntej muaj qhov teebmeem no lawm. Ntseeg tau hais tias mental illness yog ib qhov tsim txoj kev sib tua zoo li no. Tam sim no tus tub Nuj Xyooj tseem tab tom kho nyob hauv hoo maum. Tsev neeg kuv tsa muaj ib qho gofundme los pab them nws tej nqi hoo maum. Yog leejtwg muaj siab pab mus rau ntawm no: http://bit.ly/3ZAmOK2
Lus tshaj tawm los ntawm Minnesota Department of Health hais tias yog koj lub lag luam muag khoom xws li khob noom, dej qab zib, thiab tshuaj pleev xws li cream tej no uas muaj xas los yog cannabie tov nrog, koj yuav tsum mus register nrog rau Minnesota Department of Health tsis pub dhau lub 10/01/2023. Yog koj tsis register, koj yuav raug nplua mus txog $10,000. Qhov mus register no yoojyim xwb. Koj mus register online ntawm health.state.mn.us los yog hu rau (651)201-5000 yog xav paub ntxiv.
Hnub no 3HMONGTV kuj hno hais tias tub ceevxwm tseem tsis tau nrhiav tau Chang Cheng uas tau plog lub sijhawm nws mus nuv ntses. Chang yog 5 feet 6, muaj 165 pound, coj iav thiab hnav rig tso dub thiab ev lub ib lub hna liab tsem tsab. Raws li tub ceevxwm tau hais, muaj neeg pom Chang zaum kawg nuv ntses nyob ze rau ntawm Highway 152 thiab Vista Point  khwv yees li thaum 7 teev tsaus ntuj. Tus ceevxwm coob tus kuj siv nkoj thiab aub nrog lwm yam technology mus nrhiav nruab hnub hmo ntuj tiam sis nrhiav tsis pom nws li. Tam sim no, tub ceevxwm txo cov neeg nhriav tsawg lawm tiam sis tseem nrhiav ntxiv. Merced County Sheriff’s Office ceebtoom tias yog leejtwg pom thiab paub Chang thaum lub 9/21 ntawv, nej hu rau tub ceevxwm ntawm tus xovtooj no. (209)294-2091.
Hais txog ntawm tus kwjtij Chong Mua Yaj rooj plaub uas raug tua. Kws lij choj tau tshem kev lub txim  ntawm Robert Rodway uas nws thiab Thomas Olson tau tua Chong Mua Yang xyoo 2018 dhau los nyob rau ntawm Rose lake State Wildlife, xeev Michigan. Lawv muab cov txim no tshem vim yog tsis muaj pov thawj txaus raws li hais. Lawv kuj hais ntxiv tias tus kws lij choj sawv cev ntawm ob tug Miskas dawb no rov tig lus hais rau tub ceevxwm hais tias muaj lwm tus neeg tua Chong Mua Yang. Qho pov thawj no tej zaum tseem yuav tshem lub txim ntawm Robert Rodway thiab Thomas Olson. Joseph Yang uas yog tus sawv cev ntawm tsev neeg kuv tsis txaus siab rau ntawm qhov kev muab lub txim tshem.
