3HMONGTV NEWS (09/30/2024) – Hmo no peb paub qhov tseeb txog tus neeg tua ib tug txiv neej Hmoob tag sim neej hauv nroog Brooklyn Park, xeev Minnesota. Tus tua ntawv lub npe hu ua Lue Chang, 32 xyoos, raws li xovxwm tau hais. Lub weekend dhau los no, Hennepin Medical Examiner’s office tau tshaj tawm tias Ni chanon Kittikroekphon, 34 xyoos, nyob Coon Rapids tau tag sim neej hauv tsev kho mob North Memorial lawm. Raws li tub ceevxwm thiab cov txheeb ze hais, Lue Chang chim rau Kittikroekphon vim nkawv muaj lus sib cav me ntsis ces Lue cia li muab phom tua Kittikroekphon ob peb phom. Cov txheeb ze thiaj los muab Lue txhom nias rau hauv av ua ntej tub ceevxwm tuaj txog. Tub ceevxwm cia li muab Lue ntes mus kaw hauv Hennepin County Jail vim nws yog tus tua. Tamim no lawv tsis tau muab txim rau Lue raws li xovxwm hais.
Chenue Her yog thawj tus txiv neej Hmoob TV anchor nyob tebchaws Asmiskas tawm haujlwm ntawm qhov show Good Morning Iowa hauv Des Moines, Iowa los ua txoj haujlwm nyob rau Fox 9 hauv xeev Minnesota lawm. Chenue yuav los ua ib tug anchor ntawm Fox 9 Morning News thaum 4:30 txog 6 teev sawv ntxov. Chenue hais tias nws zoo siab rov qab los txog qhov chaw nws loj hlob uas yog hauv Eastside . Chenue hais ntxiv tias nws naim thiab txiv yeej nyiam saib Fox 9 Morning News los ntev lawm. Yog li no nws zoo siab los ua huajlwm rau Fox 9 Morning News. Chenue Her tus npau suav los ua ib tug TV News Reporter twb pib 12 lus lub xyoos los lawm. Tamsim no nws thiaj li tau los ua tus Anchor thiab reporter rau ntau lub TV station. Peb nrog Chenue zoo siab.
