3HMONGTV NEWS (09/27/2024) – Tamsim no muaj ntau yam xovxwm tsis zoo tshwm sim nyob rau xeev Minnesota. Coob leej yeej pom thiab paub txog 2 khub niam txiv tag sim neej vim tsheb sib tsoo nyob rau xeev Utah rau nag hmo lub 9/26 khwv yees li ntawm 1 teev tav su. Nyob rau nub no tub ceevxwm Utah Highway Patrol qhia lawv cov npe tawm. Cov caij hauv lub tsheb Nissan es tag sim neej yog Sang Her, 56 xyoo, nyob hauv zos Brooklyn Center, xeev Minnesota, Lee Thao, 38 xyoo, nyob hauv zos Brooklyn Center, xeev Minnesota, Bee Moua, 26 xyoo, nyob hauv nroog St. Paul, thiab Mai Lor, 25 xyoos nyob hauv nroog St. Paul thiab. Raws li tub ceevxwm hais, muaj ntau lub tsheb sib tsoo thiaj li uas rau lawv tag sim neej zaum no. Qhov sib tsoo ua rau traffic nres ntev heev hauv txoj kev highway US 6 ntawv. Tamsim no xovxwm tsis tau tso lawv cov duab vim lawv tsis tau tso cai los ntawm tsev neeg. Tiamsis cov txheeb ze thiab paub lawv twb muab tso tawm hauv social media tag lawm.
Tamsim no tus kwvtij uas muab phom tua Tswb Muas tag sim neej raug lub txim second degree murder thiab intent to kill los yog txhob txwm npaj siab tua neeg. Yog tias thaum los hais plaub, cov neej txiav txim nws txhaum cev yuav raug kawv 40 xyoo. Tamsim no Lwb Chang qhov bail los yog nyiaj mus tso yog in lab dollas. Tswb Muas tsev neeg tsa muaj ib lub Gofundme los pab ua nws lub ntees.
Thaum kwg no kuj yog ib qhov xovxwm zoo txog ntawm tsev neeg Hmoob. Hnub no Stearns Bank tuaj tsa muaj ib qhov chaw txais nyiaj thiab tso nyiaj nyob rau hauv HmongTown Marketplace. Kuj muaj cov neeg ua haujlwm rau lub bank no tuaj hais lus thiab qhia txog lawv li dejnum kom pejxeem paub txog lawv.
Tuam Xyooj uas yog tus tswv ntawm HmongTown Marketplace hais tias Stearns Bank npaj siab tseem yuav ua ib lub office rau hauv lub HmongTown Marketplace tshiab yuav los rau xyoo 2025.
Ntawm no yog 3HMONGTV newsbrief, kuv yog Yau Muas. Sawvdaws nyob zoo.
