Tshuav li 14 hnub ces txog caij xaiv tsa tus President nyob hauv tebchaws Asmeskas no. Xyoo no yog ib xyoo tseem ceeb heev vim peb lub neej mus 4 xyoo tom ntej yuav zoo li cas yuav yog los ntawm tus nom peb xaiv xyoo no. Yog li no thiaj li tseem ceeb heev rau pejxeem Hmoob  txhua tus uas yog xam xaj Asmeskas thiab 18 xyoo rov sauv mus pov suab xaiv tsa nomtswv. Tam sim no nej mus pov npav tau lawm txhob tos txog lub 11 hlis hnub 5 tsam muaj neeg coob thiab tau tos ntev. Nej lub suab muaj nqi heev, mus vote xyoo no.
Hnub no peb hnov tias Sawm Lis tau tag sim neej lawm. Sawm yog ib tug txiv qeej pab kwvtij neej tsa thaum muaj ib siab ob qig los tau ntev heev lawm. Ntseeg hais tias nej coob tus yeej paub Sawm vim nws ib txwm pab sawvdaws. 3HMONGTV kuj tsim tau ib qhov program hu ua “Hmoob Kab Lis Kev Cai” uas Sawm yog tus los hais lus nyob rau qhov program ntawv. Qhov show no ua los mus tau 1 xyoo txwm nkaus. Yog paub li cas txog nws lub ntees peb mam rov qhia rau nej sawvdaws paub.
Nyob rau lub 10 hli hnub tim 27 yuav los no, Hmoob 18 Xeem yuav qhov lawv lub tsev Hmong Community Center rau sawvdaws tuaj saib ua ntej muab kho dua ntxiv kom raws li 18 Xeem xav tau. Lawv yuav qhib qhov rooj thaum 8 teev sawv ntxov mus txog 6 teev tsaus ntuj. Lawm thov cawv ib tsoom Hmoob nyob hauv xeev Minnesota tuaj koom. Chaw nyob yog li ntawm nej pom no.
Yog leejtwg xav kawm mus contract haujlwm hauv state, lawv mus qhia nyob rau lub 11/13. Nej mus register ntawm li nej pom ntamw no.
