Raws li ntau tsab xovxwm tau tshaj tawm, Senator Tou Xiong sawv cev District 44 hauv Little Canada, Maplewood, los mus rau North St. Paul, raug tub ceevxwm ntes nag hmo sawv ntxov, lub 8/14 vim tsav tsheb qaug cawv. Zaum no twb yog zaum ob lawm. Senator Tou Xiong sau ntawv tawm hais tias nws mus koom tsev neeg los txog tom kev ces tub ceevxwm tau ntes nws ze ntawm nws tsev vim lawv pom tias nws qaug cawv. Senator Tou Xiong hias tias nws yeej lees txhaum thiab thov zam txim rau nws cov pejxeem. Nws hais ntxiv tias nws ua tsaug rau tub ceevxwm rau lawv txoj dejnum xaib xyuam kom muaj kev ruaj ntseg hauv tev kev tsheb. Nws yuav nrog nws tsev neeg thiab cov phoojywg ua haujlwm ua ke tham txog qhov teebmeem no. Cov nov yog lus hais los ntawm Senator Tou Xiong.
Xyoo 2022, Senator Tou Xiong twb raug ntes thiab raug nyob probation 1 xyoo vim tsav tsheb quag cawv.
Representative Kaohly Her yuav tsa muaj ib lub koobtsheej los qhia txog nws lub campaign sib tw tuav lub meejmom tswv zos nroog St. Paul. Xyoo no raws li paub muaj 3 leeg los sib tw lub meejmom no vim Mayor Melvin Carter txiav txim rov khiav dua. Lub koobtsheej no hu tias Kaohly Community Kickoff yuav tshwm sim rau hnub Tuesday, 8/19, nyob tawm Lake Monster Brewing nroog St. Paul. Ib qho ntawm lub koobtsheej no yog los nrhiav nyiaj txiag los txhawb rau nws lub Campaign. Yog tias Rep. Kaohly Her raug xaiv, nws yuav yog tus Hmoob thib 3 los tuav lub meejmom Mayor nyob tebchaws Asmeskas.
Xyoo no nyob rau tom Minnesota State Fair yuav rov qab muaj Hmong Day. Hmong Day at the MN State Fair twb ua los tau 10 xyoo lawm. Hmong Day yog ua los qhia txog Hmoob txuj ci, Hmoob keebkwm, thiab lwm yam kom lwm haiv neeg paub Hmoob zoo thiab muaj kev phoojywg. Xyoo no cov Asmeskas xav rov caw niam txiv kwvtij neejtsa Hmoob tuaj koom kom coob li coob tau. Lawv muaj khoom noj khoom haus ntau heev thiab muaj kev lom zem txhua yam. MN State Fair yuav pib lub 8/21 mus txog ntua 9/1 Labor Day. Tamsim no twb muaj pib muag nyob ntawm lawv lub website MNStateFair.org los yog MNStateFair.org/Hmoob. Mus yuav tamsim no thiaj li tau discount.
Lub tshaj tawm los ntawm Txiv nai phoo Vaj Pov tsev neeg, lawv yuav muab Txiv Nai phoo tus tub Vam Txoov Vaj los ua kev cai nyob rau ntawm Legacy Funeral Home, nroog St. Paul rau lub 10/10 mus txog 12. Vam Txoov Vaj tau tag sim neej rau lub 8/8 dhau los no. Nws yog tus tug thib 2 ntawm Nai Phoo Vaj Pov. Tom qab Nai Phoo Vaj Pov tag sim neej, Vamtxoov los tuav lub koomhaum United Lao Council for Peace, Freedom, and Reconstruction nyob Asmeskas. Yav dhau los sawvdaws yeej pom Vamtxoov tuaj koom ntau lub koobtsheej, ntau lub ntees ploj ntees tuag txhawb zog rau tsev neeg Hmoob. Tsev neeg pom zoo cia Vang Council nyob xeev Minnesota los khiav dejnum rau nws lub ntees zaum no.
Thaum kawg no xovxwm tshaj tawm tias yog leejtwg pom ib co luav tuaj kub ntawm lub tob hau uas lawv hu tias Frankenstain Rabbit, li nej pom ntawm no, tsoomfwv ceebtoom pejxeem kom tsis txhob mus ze tsam kis kabmob rau sawvdaws. Raws li hais, cov luav tuaj kub no muaj nyob hauv ntau lub parks hauv teb chaws Asmeskas.
