Raws li xovxwm hais tawm, Trump administration xa 2,100 tus ICE agents tuaj rau xeev Minnesota lawm. Hnub no thaum sawv ntxov, muaj ICE ntes neeg nyob hauv nroog St. Paul eastside nyob rau ntawm txoj kev Payne thiab Jenks Avenue. Lub luag haujlwm ntawm cov ICE agents no yog tuaj xwj thiab ntes cov neeg tsis muaj ntaub ntawv nyob tebchaws no, qhov loj yog tuaj xwj thiab ntes cov neeg ua chaw zov menyuam txhaum cai. Vim yog muaj qee lub chaw zov menyuam tuav los ntawm cov neeg Somali ua txhaum txoj cai thiab dag tau nyiaj noj ntau heev, Trump Administration thiaj li xa ICE agents coob zuj zus tuaj ntes neeg nyob xeev Minnesota.
Hna hmo, Governor Tim Walz tshaj tawm tias nws yuav tsis los khiav ua tswv xeev zaum peb lawm vim yog teebmeem txog kev dag nyiaj poob ntau heev los ntawm cov neeg Somali thiab tsis tas li Trump administration ua nruj zuj zus tuaj hais tias yog tim Governor Walz kev coj thiaj li muaj cov teebmeem no. Yog Governor Walz tsis ua lawm, leejtwg thiaj li xav npaj los ua tus thawj tswv xeev. Raws li xovxwm tshaj tawm, hauv pab pawg Democrat, US Senator Amy Klobuchar yog ib tug uas npaj yuav los tuaj lub meejmom no. Tus ob yog MN Secretary Steve Simon, tus peb yog MN Attorney General Keith Allison. Ntawm pab pawg Republicans los yeej muaj li ntawm 10 ntawm leej xav los sibtw tuaj lub meejmom no thiab.
Qhov xovxwm loj nrov thoob tebhcaws tamsim no yog Trump mus tua tebchcaws Venezuala nyiag coj tau Venezuela tus nom Nicholas Maduro thiab nws pojniam tuaj hais plaub nyob tebhcaws Asmeskas. Tsis tau ntev tom qab, muaj kev ntawm tsam los ntawm ntau lub tebchaws tshwj xeeb yog tebchaws Suav tsis pom zoo uas Suav hais tias ua li no txhaum cai ntiaj teb los yog International Law. Tsis yog Suav xwb, coob tus nom Asmeskas, txawm yog Republicans los yog Democrats, yeej tsis txaus siab txog qhov nov. Feem coob hais tias qhov tseeb yog Donald Trump xav tau cov roj nyob hauv tebchaws Venezula xwb tsis yog kev xa yeeb xa tshuaj tuaj rau tebchaws Ameskas. Cov txim muab rau Nicholas Maduro yog muaj kev koom tes los ua phem, ua luam yeeb tshuaj, muaj riam phom thiab lwm yam foob pob, thiab muaj kev koom tes los tsim riam phom thiab foob pob. Tiamsis Nicholas Maduro hais meej tias nws tsis muaj kev txhaum dabtsi.
Ntxiv mus, Trump tseem hawv tias tebchaws Cuba yuav raug tua tib yam li no thiab vim Cuba tus nom hais lus tawm tsam Trump. Tsis yog Cuba xwb, ntau lub techaws los tseem yuav raug tua zoo li no thiab.
Trump kuj hais tawm tias nws tseem yuav txeeb kom tau tebchaws Greenland los ua tebchaws Asmeskas. Raws li kev ntsuam xyuas, tamsim no nyuam qhuav yog 33 feem pua pom zoo Trump mus cuam tshuam tebchaws Venezuela. Feem coob pejxeem Asmeskas tsis pom zoo vim lawm hais tias President Trump tsis muaj cai txawv teb chaws los yog foreign policy zoo.
Nyob rau hnub no, Governor Tim Walz thiab MN Dept. of Employment thiab Economic tshaj tawm tias qhov Minnesota’s Paid Leave Program muaj coob tshaj 17,983 tus pejxeem twb apply lawm. Twb muaj ntau tshaj 3,000 tus neeg tos npe los siv qhov program no raws li ntaub ntawv hais los ntawm MN Department of Employment thiab Economic. Nyob rau ntawm qhov program no, ib tus neeg ua haujlwm muab cai los nyob mus li 20 lub as thiv yog tau menyuam tshiab, muaj mob nkeeg nyhav, los yog los tu ib tug neeg muaj mob. Thaum los so li no lawm, lub chaw haujlwm yuav tsis tos tus neeg ntawv. Lawv yuav them nyiaj rau tus neeg thaum lub sijhawm nws los so.
