Rep. Kaohly Vang Her taug kev txhawb los ntawm Jim Vue, tus Board Director nyob rau St. Paul Public Schools. Xyoo no Rep. Kaohly Vang Her npaj los ua tus Mayor hauv nroog St. Paul. Yog Rep. Kaohly Vang Her tau los ua Mayor nws yuav nrhiav kev los cog phoojywg nrog tsev kawm ntawv thiab ua kom muaj kev kawm zoo rau menyuam thiab pab rau cov xibhwb qhia ntawv. Lub 10/21 hnub Tuesday thaum tsaus ntuj yuav los no, tag nrho cov los sib tw ua Mayor yuav los sib theev tswv yim nyob ntawm Harding High School seb leejtwg muaj peevxwm los tuav lub meejmom rau 11/4. 3HMONGTV npaj mus thaij ncaj nraim tuaj rau nej saib. Nco tsoov tig los saib peb nyob rau hmo ntawv.
Raws li xovxwm tshaj tawm, Trump adminstration hais tawm tias cov tub ntxhais muab xovxwm nyob Pentagon hauv Washington DC yuav tsum tau kos ib tsab ntawv ua ntej thiaj li tso cai rau lawv muab xovxwm vim tsis xav pub kom lawv tshaj tawm tej yam tsis tau tso cai los ntawm Trump administration. Muaj coob tus tub ntxhais muaj xovxwm los ntawm cov tuam txhaj xovxwm loj xws li ABC, CBS, NBC, The New York Times, thiab ntau lub network tsis pom zoo kos tsab ntawv no. Yav dhau los Trump yeej ua ntu zus hais tias cov tuam txhaj tshaj xovxwm no yog cuav xwb tsis tshaj tawm qhov tseeb. Coob leej ntseeg tias ua li no yuav txwv lawv kev tshaj xovxwm tseem ceeb pub rau pejxeem Asmeskas. Yog li no ntau tus tub ntxhais muab xovxwm thiaj li tawm hauv Pentagon los mus tsev lawm.
Dr. Kevin Xiong raug xaiv los tuav lub meejmom Executive Director rau lub tsev kawm ntawv HOPE Community Academy nyob nroog St. Paul Eastside. Tus Executive Director yav dhau lo yog Maivchi Vwb tiamsim nws tawm mus so lawm. Hope Community Academy muaj li ntawm 780 tus menyuam kawm ntawv thiab yog Hmoob thawm lub charter school nyob xeev Minnesota qhib xyoo 1999. Dr. Kevin Xiong yeej muaj tswvyim txog kev kawm ntawm rau menyuam thiab kev coj hauv tsev kawm ntawv yav dhau los. Peb zoo saib rau Dr. Kevin Xiong.
Tagkis lub 10/18 thaum 5 mus txog 8 teev tsaus ntuj, yuav muaj ib lub koobtsheeb txog Hmoob nyob rau tim Minnesota History Center tham txog 50 xyoo Hmoob thoj nam tawg rog tuaj rau xeev Minnesota. Sob lus muab los tham yog Rooted in Resilience: Nourishing Our Spirits, Growing Our Roots. Lawv yuav qhia txog zam tsoos Hmoob, zaub mov Hmoob, thiab piav txog dabneeg ua neeg thoj nam tawg rog thiab ntau yam. Vam tias sawvdaws yuav tuaj koom.
Thaum kawg no, St. Paul Public Schools Board tshaj tawm hauv kev sibtham tias lawv tsis pom zoo txog kev pab rau Hmoob lub tsev kawm ntawv Txuj Ci. Raws li paub, cov niam txiv thiab xibhwb Hmoob twb nrog St. Paul Public Schools sib tham thaum lub 3 hlis txog kev los kho lub tsev kawm ntawv Txuj Ci kom muaj Dual Language program, ua kom muaj kev loj hlob tuaj, thiab kom cia cov menyuam kawm ua kev yog tias lawv nyob hauv ib tsev neeg. Qhov cov niam txiv lawv tsis txaus siab yog vim tsev kawm ntawv pheej muab ncua. Nyuam qhuav tsis ntev no tsev kawm ntawv muaj ib lub rooj sibtham, tus Superintendent nrog rau cov Board tsis pom zoo los kho lub tsev kawm ntawv no raws li cov niam txiv thiab xibhwb xav tau kev pab. Tsis ntev tom ntej no peb yuav muaj cov niamtxiv nrog rau cov xibhwb tuaj tham txog qhov teebmeem no kom paub tseeb dua qhov nov.
