Trump tsab The Big Beautiful Bill Act twb tau dhau los mus ua cai txij thaum lub 7 hli tim 4 los lawm. Tsab cai no yuav raug cov pejxeem zoo li cas.
Medicaid yuav raug txiav los li ntawm $930 Billion duas las mus li 10 xyoo tom ntej uas yuav raug 17% ntawm cov neeg Asia nyob tebhcaws no.
1 million tus neeg Asia yuav raug txiav nyiaj muas no uas yog cov nyiaj los ntawm SNAP los yog Supplemental Nutrition Assistance Program.
6% ntawm cov neeg Asia nyob tebchaws no yog tub ntxhais kawm ntawv qib siab yuav raug txiav nyiaj Pell Grant uas txiav lawv kev mus kawm kom tau degree rau sab medicine, law, thiab lwm yam kev kawm. Tsis yog tas li no xwb tseem txhuav ntau yam uas yuav raug txiav. Yog li no tamsim no cov nom uas yog neeg Asia nyob tebchaws tab tom nrhiav kev los tawm tsam cov cai no hais tias lawv xav tau cov cai los pab kom pejxeem mus tom ntej.
Tamsim no raws li xovxwm tshaj tawm, ib nrab ntawm cov neeg immigrants raug ntes los ntawm ICE yog cov neeg yeej tsis muaj kev txhaum yav dhau los qhia tau tias tsis yog ntes cov neeg phem xwb tiamsis puav leej ntes cov neej tsis muaj txim lawm thiab. Txij li lub 6 hli hnub tim 30 los, Department of Homeland Security ntes coob tshaj li 270,000 tus neeg, xa rov qab coob tshaj 239,000. ICE cov tsev kaw neeg muaj 56,397 tus neeg immigrants uas raug ntes, 46% ntawm cov neeg no yeej tsis muaj keebkwm kev txhaum yav dhau los. Tamsim no mus rau tom ntej, ICE tseem yuav ntes neeg ntxiv vim Congress pom zoo muaj $170 Billion duas las los siv rau qhov no thiab txwv tsis pub neeg hla ciam tab Asmeskas.
ICE twb xa 8 tus neeg mus rau tebchaws South Sudan uas tamsim no tab tom muaj tsov rog loj heev uas Asmeskas twb tsis pub pejxeem Asmeskas mus. Ntawm 8 tus neeg raug xa no yog neeg Nplog, neeg Cuba, neeg Mev, neeg Pabmab, neeg Nyablaj, thiab neeg Sudan tiamsis tsis paub tias pes tsawg leej. US District Court hais tias Trump Administration tsis muaj kev ncaj ncee rau cov neeg no vim tsis muaj due process los yog kev cheem los ntawm cov cai. Tamsim no tsis paub tias 8 tus neeg ntawv nyob rau qhov twg lawm.
Qhia rau sawvdaws hais tias yuav muaj kev tawm tsam Donald Trump hu tias The “Good Trouble Lives On” protests yuav tshwm sim thoob plaws tebchaws Ameskas rau lub 7/17 yuav los tom ntej no. Pab pawg tsim muaj qhov kev tawm tsam no hais tias lawv yuav tawm tsam ntsiag to xwb tsis pub ua kev kub kev ntxhov. Lawv ntseeg tias kev muaj zog yog los ntawm pejxeem.
Raws li paub, tseem nrhiav tsis tau tau tus ntxhais Lydia Chang uas tau ploj txij lub 5/2 los lawm. Muaj neeg pom nws zaum kawg nyob ntawm Bigby Villa hnav lub tsho ntsuab thiab ris dub, hauv nroog Fresno, xeev California. Lydia muaj 4 feet 11 inches, 120 pounds, plaub hauv dub ntev txog ntawm duav. Yog leejtwg pom thiab paub nws nyob qhovtwg lawm, hu los yog text rau 2 tug xovtooj li pom ntawm no.
Nco ntsoo subscribe rau 3HMONGTV hauv Youtube thiab caum peb hauv Facebook.
