3HMONGTV Newsbrief | July 16, 2025

3HBC News (07-16-2025) – Xp Lee los yog Xyooj Pov Lis, uas yog ib tug qub Brookyln Park City Council member tshaj tawm tias nws yuav los khiav tuav lub meejmom Minnesota District 34B uas tuav los ntawm Rep. Melissa Hortman. Raws li sawvdaws paub, Rep. Hortman thiab nws tus txiv raug tua tag sim neej hauv nkawv lub tsev nyob rau lub 6 hli dhau los. Nag hmo lub 7/15, Xp tuaj mus tso npe los sibtw rau lub meejmom no. Xp Lee yeej muaj tswvyim los ntawm cov dejnum nws tau ua los pab pejxeem minnesota ntau tshaj 20 xyoo. Qhov primary rau qhov kev xaiv tsa yog lub 8 hli hnub tim 12 yuav los no. Nws xav kom sawvdaws pab txhawb nws kom tau los tuav lub meejmom no. Xav paub ntxiv txog Xp Lee, mus saib ntawm lub website no. www.xpleeformnhouse.com

Zang Vang Lee raug xaiv los tuav lub meejmom Executive Director rau lub koomhaum Hmong Early Childhood Coalition nyob xeev Minnesota. Zang twb ua haujlwm pab rau niamtxiv nrog rau menyuam hauv tsev kawm ntawv los tau ntau xyoo lawm. Ntseeg tias Zang yuav los pab kom HECC nce mus ib theem thiab kom hlob loj zuj zus. Nws twb los pib txoj dejnum no txij thaum lub 7/1 los lawm. Pab zoo siab rau Zang Vang Lee.

Muaj coob leej sau ntawv tuaj rau peb hais tias tamsim no lawv hnov neeg hais hauv social media hais tias cov neeg mus ncig ua si txawv tebchaws rov los nkag tsis tau tebchaws Asmeskas lawm no puas muaj tseeb.  Qhov nov tsis muaj tseeb. Yog koj yog US citizen lawm, koj muaj cai rov qab nkag tebchaws Asmeskas tsuav koj muaj koj daim passport nrog koj. Yog koj nqa tejyam khoom txhaum cai los yog ua luam yeeb thiab lwm yam, koj yuav raug ceev thiab xwj los ntawm tub ceevxwm. Yog koj muaj npav ntsuab xwb los koj yeej muaj cai nkag tau tebchaws Asmeskas. Tiamsis yog koj mus ua si ntev tshaj 1 xyoo lawm koj yuav tsum apply daim ntawv re-entry permit ua ntej koj rov los. Yog koj ua tejyam txhaum cai, cov tub ceevxwm Customs thiab Border Protection yuav ntes thiab txwv tsis pub koj nkag tebchaws Asmeskas. Paub thiab ua raws li txoj cai, mloog qhov tseeb ces yeej tsis ua li cas. Kaj tsij tso siab plhuav mus ua si.

Yog tias leejtwg xav ua haujwm tom MN State Fair xyoo no, lawv yuav muaj ib lub Job Fair rau lub 7/23 thaum 4 teev mus txog 7 teev tsaus ntuj nyob rau ntawm North End Event Center hauv State Fair. Nej yuav tau nrog lawv tham txog cov haujlwm qhib cev lawv mam match nej cov experience rau txoj haujlwm ntawv. Npaj kom txhij vim lawv yuav interview nyob rau hnub ntawv. Lawv yauv tsis kom nej nqa nej daim resume. Yog txaus siab mus register ntawm lub website nej pom ntawm no sai li sai tau: mnstatefair.org/get-involved/employment/

Thaum kawg no Suni Lee raug xaiv los ua ib tug Best Comeback Athlete. Txawm tias nws twb mob raum lawm los Suni tseem los mus koom kev sib twb nyob rau Paris 2024 Olympics. Qhov 33rd Annual ESPY Awards no yuav tso tawm lub 7/16 nyob rau Los Angeles, California raws li xovxwm tshaj tawm. Kuv muaj 3 leeg nrog rau Suni tau txais qhov award no thiab.
Nco ntsoov mus subscribe rau 3HMONGTV hauv Youtube.