Nag Hmo lub 9/16, Governor Tim Walz tshaj tawm tias nws txiav txim rov los khiav ua Governor zaum peb nyob hauv xeev Minnesota. Yog tias nws rov yeej dua los ua tus governor, qhov nov yuav yog ib qho keebkwm vim tsis tau muaj dua li. Governor Tim Walz hais tawm tias yog nws tau rov los tuav lub meejmom no, cov haujlwm tseem ceeb yog nrhiav ntes cov neeg dag ntxias pejxeem nyiaj, ua kom nqi kho mob pheejyig, nrhiav nyiaj los pab tsev kawm ntawv, thiab qhov loj koj tsis pub muaj kev phomsij los ntawm riam phom.
Tamsim no nyob hauv xeev California, Mai Vang uas yog ib tug Sacramentao City Council member tab tom los sibtw tuav lub meejmom hauv US Congress. Mai yuav los sib tw los yog challenge nrog Rep. Doris Matsui. Rep. Doris Matsui yeej tuav lub meejmom no los tau ntev lawm. Hnub Sunday, Lub 9/21 thaum 12 teev tav su, Mai yuav tsa muaj ib lub koomtxoos nyob rau ntawm William Land Park qhia sawvdaws txog nws kev los sib khiav los yog Campaign kickoff rau lub meejmom no.
Raws li xovxwm tshaj nyob hauv xeev Minnesota, tus thawj ntawm lub tsev kawm ntawv Hmong College Prep Academy, Dr. Christiana Hang, zoo siab them Minnesota Attorney General’s office $220,000 los ntawm kev txiav txim rooj plaub uas nws tau siv ntau tshaj $4 lab duaslas mus invest rau ib qhov hedge fund uas txhaum cai. Nyob rau lub 12 hlis 2024, Minnesota Attorney General Keith Ellison tau foob Dr. Christiana Hang vim nws siv $5 laab duas las mus invest uas tsis tau kev tso cai los ntawm cov board hauv lub tsev kawm ntawv thiab yog ib qhov txhaum cai.
Raws li tub ceevxwm tshaj los ntawm Twin Cities Crime Watch thiab information, tub ceevxwm ntes tau 22 tug neeg nyob hauv nroog Blaine xeev Minnesota vim lawv ntiav menyuam tsis tau muaj hnoob nyoog los deev. John Kang Vang yog ib tug ntawm 22 tug uas raug ntes. Lawv kuj muab tag nrho cov neeg no cov duab los tso tawm qhia rau sawvdaws. Raws li xovxwm hais tub ceevxwm txhob txwm hnav ris tsho li tus menyuam ntxhais sau ntawv tawm mus rau 460 tus neeg. Muaj 22 leeg tau teb thiab tuaj rau ntawm ib qho chaw es them nyiaj yuav npaj deev tus ntxhais ntawv. Cov neeg no raug tso los lawm tiamsis yuav rov mus ntsib xam tsis ntev tom ntej no. Tub ceevxwm hais tias qhov kev ntes cov neeg no yog ib qhov kev los tiv thaiv cov menyuam tsis tau muaj hnoob nyoog uas raug neeg ua phem thiab raug ntxias.
Thaum kawg no Minnesota Dept. of Natural Resources tshaj tawm qhia rau sawvdaws paub tias tamsim no muaj neeg coob mus yos hav zoo tua nas, sawvdaws yuav tsum hnav khaub caws thiab ntoo kaus mom liab ci kom neeg thiaj pom. Tsis txhob mus hla av muaj tswv, thiab yuav tsum tua nas tsis pub tshaj raws li txoj cai xwb. Minnesota DNR yeej xa kom sawvdaws mus ua si tej hav zoo hav tsuag, nrhiav kev lomzem tiamsis kom txhob raug teebmeem.
