Hnub Monday 9/29 dhau los no, Trump Administration foob xeev Minnesota vim nroog Minneapolis thiab St. Paul yog ob lub nroog uas lawv hu tias sanctuary cities uas pab cov neeg tsis muaj ntaub ntawv nyob tebchaws Asmeskas. Rooj plaub no hais tias cov cai hauv cov nroog tau muaj cov neeg phem tso tawm hauv tsev kaw neeg txawm lawv twb tsim nyog xa rov qab. Trump Administration kom cov tsev hais plaub federal rov tshawb cov cai uas tiv thaiv tsis pub ICE ntes cov neeg no. US Attorney General Pam Bondi hais tias cov nom hauv xeev Minnesota ua kom tsis txhob muaj kev ruaj ntseg rau pejxeem vim lawv cia cov neeg phem tsis muaj ntaub ntawv nyob ua tsis raws li txoj cai. Cov xeev uas raug foob los ntawm Trump administration yog Colorado, Illinois, New York, New Jersey, thiab ob peb lub nroog. Minneapolis Mayor Jabcob Frey thiab St. Paul Mayor Melvin Carter hais tias nkawv puav leej tsis txaus siab thiab tsis tso tseg rooj plaub foob zaum no.
Raws li xovxwm tshaj taw, pib lub week no mus nroog Minneapolis yuav tsa muaj ib qho pilot program los tiv thaiv kom tsis txhob muaj tsheb sib tsoo raug mob los yog tag sim neej. Lawv yuav nruab cov koob thaij rau hauv kev kom yees tau cov license plate ntawm cov neeg tsav tsheb ceev thiab hla teeb liab. Cov koob thaij no yuav nruab nrog cov teeb liab teeb ntsuab nyob hauv kev sib tshuam. Tamsim no muaj li 5 qhov chaw uas muaj cov koob thaij no. Cov chaw no yog Nicollet Avenue South ze txoj kev 46 Street West, Chicago Avenue South ze rau txoj kev Franklin Avenue East, Third Street North ze txoj kev First Avenue North, 18th Avenue Northeast ze txoj kev Central Avenue Northeast, thiab muaj rau ntawm txoj kev Fremont Avenue North ze txoj kev Broadway Avenue North. Yog nej leejtwg tsav tsheb mus rau nroog Minneapolis, xyuam xim txhob khiav ceev thiaj tsis tau ticket. Cov ticket no lawv yuav xa tuaj hauv hauv mail yog tias nej leegtwg tsav tsheb txhaum cai.
Lub 10/18 Minnesota Historical Society tsa muaj ib lub koomtxoos nco txog Hmoob tuaj rau Minnesota tau 50 xyoo. Tamsim no cov tsa lub koom txoos no tab tom nrhiav seb puas muaj neeg xa lawv li dab neeg keebkwm mus rau lawv. Cov dag neeg no yuav muab cov los tso rau tim Minnesota Historical Society rau hnub ntawv. Yog tias leejtwg xav mus koom, mus register ua ntej. Lawv yuav pib thaum 5 teev mus txog 8:30 tsaus ntuj nyob rau ntawm Minnesota History Center, nroog St. Paul.
Xp Lee uas yog ib tug Hmoob uas nyuam qhuav raug xaiv los tuav lub meejmom House Representative sawv cev District 34B tau los tsa tes lees ua txoj dejnum no. XP Lee hais tias nws muaj hmoo los ua txoj dej num no pab rau cov pejxeem nyob rau nroog Brooklyn Park, Coon Rapids, thiab Champlin. Lub meejmom no yav dhau los yog tuav los ntawm Melissa Hortman. Tsis muaj hmoo Melissa thiab nws tus ntxiv raug tua tag sim neej lawm. Xp hais ntxiv tias nws yuav sib zog kom nqa tau Rep. Melissa Hortman qhov keebkwm mus ntev yav tom ntej. Nws yuav ua txhua yam kom lub neej tom ntej kom muaj kev vam meej thiab ua kom muaj raws li hais pub rau sawvdaws. XP Lee yog Hmoob thib 6 los tuav lub meejmom House Representative nyob xeev Minnesota. Nrog zoo siab.
Mus subscribe rau 3HMONGTV tshooj Youtube thiab mus saib peb ntawm hbctv.net.
