President Trump hais tias yog Thaib tsis tso tseg es yuam cai ntawm daim ntawv cog lus tsis pub muaj sib ntaus sib tua ces nws yuav nce se los yog tariff ntxiv rau Thaibteb. Tamsim no Thaib cov se them rau khoom tuaj lwm teb chaws tuaj yog 19 feem pua. Yog Thaib nrhiav teebmeem ntxiv rau Kabmin, Trump tseem yuav nce se mus li ntawm 36 feem pua.
Nyob rau nag hmo, 11/12, pab pawg Republicans thiab Democrats los pov suab rov los qib nomtswv federal. Thaum kawg pab pawg Republicans tau suab ntau dua, txhais tau tias nomtswv Federal rov qhib dua tiamsis qhib raws li kev pom zoo los ntawm pag pawg Republicans. President Trump thiaj li los kos npe rov qhib nomtswv Federal kom rov muaj kev pab rau pejxeem Ameskas. Pejxeem Asmeskas yuav rov txais cov nyiaj SNAP uas yog nyiaj muas noj puv nkaus li qub tom qab 24 teev uas Trump kos npe. Qhov kaw los ntawm nomtswv Federal no yog qhov ntev tshaj plaws.
Trump cog lus tias nws yuav muab $2,000 duas las tuaj pub rau pejxeem Asmeskas puas muaj tseeb thiab leejtwg thiaj cov nyiaj no los qhov twg los. Raws li xovxwm tshaj tawm, ua ntej cov nyiaj no yuav xa tau rau pejxeem, Trump yuav tsum tau kev tso cai los ntawm Congress. Cov nyiaj no yog muab los ntawm cov se tariffs uas Trump kev tau. Yav dhau los Trump twb hais tias nws yuav muab 20 feem pua ntawm cov nyiaj tau los ntawm DOGE los faib rau pejxeem tiamsis tsis tshwm sim dabtsi. Elon Musk twb ho tawm hauv DOGE lawm thiab. Trump hais tias nws yeej yuav muab tiamsis tsis muaj ntaub ntawv qhia tseeb hais tias cov nyiaj no yuav them mus rau cov menyuam los yog li cas tiag.
Tamsim no mus, tsoom fwv yuav tsis luam cov nyiaj ib cent lawm. Cov nyiaj 1 cent no twb tsim thaum xyoo 1793 los lawm. Tamsim no sawvdaws tseem siv tiam sis yog thaum tsis muaj lawm, cov lagluam yuav txo nqi los kom haum tsis pub siv cov nyiaj cent no lawm.
Cuab kwv tij nrog rau cov tub ki yuav muaj Dr. Lis Pov Yaj lub ntees los ua kev cai rau 12/6 thiab 7 nyob rau ntawm Moon Sun Memorial Services, nroog Sacramento, xeev California. Dr. Lis Pov Yaj tau tag sim neej lub sijhawm nws tuaj rau xeev Minnesota lub 10 hli dhau los no. Dr. Lis Pov Yaj hais lus nyob rau ntawm tshoob Youtube hu ua United Hmong Vision.
Tom qab tub ceevxwm Tou Thoj tawm hauv tsev kaw rov los nrog nws pojniam menyuam nyob ua ke, muaj ib lub fundraiser los yog koobtsheej nrhiav nyiaj los pab rau nws los npaj nws lub neej dua raws li xovxwm tshaj tawm. Officer Tou Thoj raug teebmeem federal thaum tub ceevxwm tua George Floyd tag sim neej nyob rau lub 5/25/2020. Tou Thoj twb mus kaw 3 xyoo ntawm mam raug tso tawm los. Muaj kev txhawb nqa pub rau Tou Thoj los ntawm coob leej.
Nyob rau hnub Saturday, lub 11/15 yuav los no, muaj ib lub koobtsheej tsa muaj los ntawm Hmong Committee of 100 nyob rau hauv Grand Ballroom hauv St. Paul RiverCentre. Lub koobtsheej no ua nco txog 50 xyoo Hmoob tuaj poob rau tebchaws Asmeskas. Muaj ntau tshaj 1,000 tus neeg yuav tuaj koom. Yog nej cov nyob kev deb tuaj tsis tau, nej mus saib Live nyob rau ntawm 3HMONGTV hauv facebook thiab Youtube li nej pom ntawm no.
Koobtsheej Xyooj uas yog Hmoob ib tug tub ua movie thiab hu nkauj tuaj ua concert hauv tebchaws Asmeskas xyoo no. Nws lub concert yuav tshwm sim rau lub 11/21 nyob rau hauv Dala Thai. Kuj muaj ob peb tug tub ntxhais hu nkauj tuaj koom nrog nws nyob rau lub concert ntawv. Vam tias nej sawvdaws uas yog Koobtsheej cov fans, nej yuav tuaj koom kev lom zem rau hmo ntawv. Peb HmongTV yuav nrog Koobtsheej tham saum huab cua txog nws lub concert rau hnub Sunday, 11/16 thaum tsaus ntuj.
Thaum kawg no, yog nej leejtwg tua tau moslwj xyoo no es xa kuaj seb puas muaj cov kab mob uas hu tias Chronic Wasting Disease los yog CWD, nej mus saib ntawm lub website no. DNR yuav ceebtoom ncaj nraim rau nej yog tias nej tus moslwj kuaj muaj cov kabmob no. Tsis tas li DNR yeej xav kom sawvdaws kom coj nej tus moslwj cov samples mus kuaj tsam muaj kab mob. Qhov nov yuav qhia tau rau kom lawv paub tias thaj chaw twg muaj cov moslwj muaj cov mob no.
