Tamsim no Senator Foung Hawj tab tom mus saib pejxeem Hmoob Thaib lawm. Pab pawg Hmong Overseas Delegation cawv Senator Foung Hawj koom kev peg caug hauv Phetchabun Province thiab hais lub txhawb siab pub rau lawv. Tsis tas li, Senator Foung Hawj mus koom kev cov ntoo nyob rau Khek Noi. Zaum no Senator Foung Hawj kuj npaj tau ib daig Resolution hais txog kev sib txuas phoojywg thiab kev koom lub tsiab caug nyob hauv Khek Noi. Ntxiv mus yog mus cuag tus Governor Saranyu Meethongkham sib tham txog kev phoojywg sister city ntawm Khek Noi thiab thiab ib lub nroog nyob tebchaws Asmeskas uas muaj Hmoob nyob coob.
Tam sim no kev siv yeeb siv tshuaj, haus dej haus cawv, hauv Hmoob community ntau tuaj lawm. Thaum tiv thiab tseg tsis tau tej yam zoo li no lawm, feem coob tsis pom qab yuav mus thov kev pab qhov twg. Txhob tag kev cia siab, tam sim no muaj koomhaum los pab kom txiav tau kev haus yeeb haus tshuaj thiab cawv. Lub week yuav los no, lub 1/16, lub koomhaum KOOM Recovery nrog rau MARCO uas yog Minnesota Alliance of Recovery Community Organizations thiab Recovery Cafe Frogtown yuav tsa muaj ib lub rooj sibtham qhia txog lawv li koomhaum thiab kev pab. Yog koj los sis cov neeg koj paub es muaj teebmeem vim yog tiv yeeb tiv tshuaj, qhia lawv tuaj koom kom tau. Hnub ntawv, yuav muaj cov nomtswv tuaj mloog thiab sab laj nrhiav ib kev los pab daws cov teebmeem no. Cia siab tias sawvdaws yuav tuaj koom kom tau rau lub 1/16 thaum 5 tsaus ntuj li nej pom ntawm no.
Lus tshaj tawm hauv Hennepin County District Court hais tias Lue Chang, 32 xyoos, uas tau tua Tswb Muas tag sim neej nyob rau lub 9 hlis 2024 raug lub txim Second Degree Murder mus nyob qhov taub tshaj 25 xyoos. Nyob rau lub 9/21/2024, cov phoojywg tuaj tuaj ua kev zoo siab Happy Birthday hauv ib lub tsev ces Lue cia li muaj phom tua Tswb vim nws hais tias Tswb tsis hwm nws. Lue Chang raug mus kaw nyob rau St. Cloud.
Lub caij no nyob hauv xeev Minnesota kuj los snow thiab no heev lawm, muaj pejxeem Hmoob coob tus mus ua si txawv teb chaws tshwj xeeb yog Nplog teb. Tsis ntev no xovxwm The Laotian Times tshaj tawm tias nyob rau xyoo 2024, ntaub ntawv los ntawm Luang Prabang Tourism Department qhia tias ntau tshaj 1.5 lab tus neeg txawv teb chaws tuaj uasi rau Luang Prabang Province. Cov coob tshaj plaws yog neeg Suav, thib 2 yog neeg Thaib, thib 3 yog neeg Kauslim, thib 4 yog neeg Asmeskas. Cov neeg tuaj ua si Nplog teb nce li ntawm 19% rau xyoo 2024 pib rau xyoo 2023. Nyob rau Xyoo 2024 cov nyiaj tau los ntawm neeg tuaj ua si rau Nplog teb yog ntau tshaj $1 billion dollas vim tias nomtswv Nplog qhib visa dawb rau neeg nkag thiab ncua kev tuaj nyob Npleb teb.
Tamsim no los snow thiab no lawm, yog koj los yog cov neeg koj paub nyob hauv Ramsey County es tsis muaj chaw sov pw, hu rau Ramsey County ntawm tus xovtooj no los yog mus saib ntawm lub website RamseyCounty.us/warmingspaces. Tamsim no mus txog lub 3 hlis, lawv muaj chaw sov qhib txhua hmo thaum 9 teev tsaus ntuj mus txog 7 teev sawv ntxov. Xav nrog tham, hu rau lawv lub sijhawm 5 teev tsaus ntuj txog 5 teev sawv ntxov.
